प्रतिष्ठाको दौड
गिनिज बुकमा एकपछि अर्को रेकर्ड बनाउँदैछन्, नेपालीहरू ।
यशोदा तिम्सिना
कुरा करिब चार वर्षअघिको हो । प्रतिष्ठा अमात्य, -विष्ट), २८, एएक्सएन च्यानल हेरिरहेकी थिइन् । टीभीको पर्दामा एडिल अन्वर नामका व्यक्तिले ५५ वटा विभिन्न वस्तुका नाम फटाफट भनेर 'गिनिज बुक अफ वल्र्ड्स रेकर्ड' मा नाम लेखाउँदै थिए । प्रतिष्ठाले तत्कालै सोचिन्, ए म पनि यतिको काम त गर्न सक्छु नि ! उसो भए किन प्रयास नगरुँ ? र, तत्कालै निर्णय गरिन्, यसमा सहभागी हुने ।
यसैबीच, जस्टिन हेर्टली नामक बेलायती नागरिकले ५७ वटा वस्तुका नाम भनेर एडिलको 'रेकर्ड' तोडे । यस कुराले पनि प्रतिष्ठालाई कुनै प्रभाव पारेन । उनी अभ्यासका क्रममा सयवटा जति वस्तुका नाम फरर्र भन्ने भइसकेकी थिइन् । प्रतिष्ठाले खासै मिहिनेत गरिनन् पनि । सामान्य अभ्यासबाटै उनलाई जस्टिनको रेकर्ड तोड्न सक्ने आत्मविश्वास पलायो । बरु कुन लहरो समातेमा गिनिज बुकसम्मको यात्रा तय हुन्छ भन्ने कुराको मेसो पाउनचाहिँ समय लाग्यो ।
राज्यका कुनै पनि निकायले यसमा हौसला दिने या सहयोग गर्ने परम्परा नरहेको पनि उनले यसै अवधिमा भेउ पाइन् । तर, हिम्मत भने हारिनन् । सुरुमा गिनिज बुकको बेलायतस्थित मुख्यालयमा पत्राचार गरिन् । उताबाट सकारात्मक जवाफ आएपछि हौसिइन् । मुख्यालयले एउटा र्फम पठाउँदै लाइभ कार्यक्रमको भिडियो क्लिप र समाजका लब्धप्रतिष्ठित व्यक्तिले प्रमाणित गरिदिएको पत्र पनि पठाउन भन्यो । यसमा नोबेल एकेडेमीका प्राचार्य डा जयराज आचार्यको गुन प्रतिष्ठाले कहिल्यै भुल्ने छैनन् । भन्छिन्, "सरले सहयोग गर्ने तत्परता नदेखाइदिनुभएको भए म सक्षम भए पनि सफल भने सायदै हुन्थेँ ।"
डा आचार्यले एक औपचारिक कार्यक्रमको आयोजना गरेर प्रतिष्ठाको क्षमताको परीक्षण गर्ने औजारको काम गरिदिए । यसमा डा मोहनमान सैँजु र राजकीय प्रज्ञा-प्रतिष्ठानका तत्कालीन उपकुलपति मोहन कोइरालाले पनि 'सर्टिफाइ' पत्र बनाइदिए । यसपछि प्रतिष्ठाले प्रतिष्ठा राख्ने दिन नजिकिँदै आए । सन् २००४ का लागि नै नाम दर्ज होस् भन्ने मनसायले सबै तयारी पूरा गरेकी थिइन् । तर, गिनिज बुकको कार्यालयबाट 'भेरिफिकेसन' भइराखेको छ भन्ने जवाफ आयो । अन्ततः त्यो ऐतिहासिक क्षण आइछोड्यो । करिब तीन महिनाअघि उनको नाम गिनिज बुकमा नियमतः दर्ता भएको औपचारिक चिट्ठी प्रतिष्ठालाई आयो, जुन खबर उनले सार्वजनिक गरिसकेकी छन् ।
कृषि विषयमा स्नातक प्रतिष्ठा होटल व्यवसायी हुन् । श्रीमान् सङ्घर्ष विष्टसमेत यसै व्यवसायमा संलग्न छन् । चितवनको रामपुर कलेजमा अध्ययन सकेकी प्रतिष्ठाले भारतको सिमलाबाट प्रारम्भिक शिक्षा प्राप्त गरेकी हुन् ।
.png)
