दार्जिलिङमा विद्यार्थीलाई मोटरसाइकल र मोवाइलमा प्रतिवन्धदार्जिलिङ, २०६६ मंसिर १५ -  गोर्खाल्याण्डका लागि आन्दोलनरत गोर्खा जनमुक्ति मोर्चाले विद्यार्थीहरुलाई मोवाइलमा कुरा गर्न र मोटरसाइकल चलाउन प्रतिबन्ध लगाएको छ । विद्यार्थीहरुले मोवाइल र मोटरसाइकलको दुरुपयोग गरेको भन्दै मोर्चाले हालै उक्त प्रतिवन्ध लगाएको हो  ।

मदिराको बिक्री-वितरणमा रोक लगाएको उसले  यसअघि सरकारी कर्मचारी र कलेजका विद्यार्थीलाई नेपाली पोशाक अनिवार्य गरेको थियो । दार्जीलिङ र कालिम्पोङलगायतका बिद्यार्थीहरुमा मोटरसाइकल र मोवाइलको दुरुपयोग बढेको कारण त्यस्तो प्रतिवन्ध गरिएको मोर्चाका प्रचार सचिव विनय तामाङले जनाएका छन् । हालै मोटरसाइकल दुर्घटनामा तीन बिद्यार्थीको मृत्यु भएको थियो ।' त्यसैले उनीहरुमा मोटरसाइकल र मोवाइल प्रतिवन्ध गरिएको हो', तामाङले फोनमा भने ।

मोर्चाका केन्द्रीय सदस्य डा. हर्क क्षेत्रीले पछिल्लो समय मोबाइल र मोटरसाइकलको दुरुपयोग बढेको भन्दै विद्यार्थीहरुका लागि ती चीजहरु नचलाउन आग्रह गरिएको बताएं ।

गोर्खा जनमुक्ति मोर्चाका नेताहरुका अनुसार दुर्घटना भएर विद्यार्थीहरुको ज्यान गएपछि अभिभावकहरुकै आग्रहमा विद्यार्थीहरुलाई मोटरसाइकल र मोवाइल प्रयोगमा रोक लगाइएको हो । मोर्चाका केन्द्रीय सदस्य डा. हर्क क्षेत्रीले भने - 'अभिभावकहरुको आग्रहलाई ध्यानमा राखेर उक्त कदम चालेका हौं ।' गोर्खा जनमुक्ति मोर्चाका अनुसार विद्यार्थीले मोवाईल र मोटरसाइकलको प्रयोग गरे नगरेको बारे मोर्चाको सुरक्षादस्ता गोर्खाल्याण्ड पर्शनल -जीएलपी) ले जाँच गर्ने र प्रयोग गरेको पाइएमा जफत समेत गर्ने छ ।

मोर्चाको यो कदमलाई धेरै विद्यार्थीका अभिभावकहरुले स्वागत गरेपनि कतिपय विद्यार्थीले भने सरकारबाट सवारी साधन चलाउने अनुमति पाइसकेकाहरुलाई मोटरसाईकल चलाउन र संचारको साधन मोवाइल फोन प्रयोग गर्न प्रतिबन्ध गरेर मोर्चाले मानवअधिकारको हनन गरेको भन्दै आलोचना गरेका छन् ।