From : BBC
मध्यपश्चिमको एउटा प्रमुख शहर नेपालगञ्जमा माओवादी विद्रोहीहरूले ठूलै आक्रमण गरेका छन्।
प्रारम्भिक विवरणहरूका अनुसार त्यहांस्थित सुरक्षा निकायका विभिन्न ठेगानाहरूलाई निशाना बनाइएको बताइएको छ।
नेपालगञ्जस्थित बीबीसी नेपाली सेवाका सम्वाददाताका अनुसार त्यहांका जिल्ला प्रहरी कार्यालय, नेपाल राष्ट्र बैंकको कार्यालय, कारागार लगायतका स्थानमा सुरक्षा सैन्य र आक्रमणकारी विद्रोहीहरूबीच भिडन्त भएको थियो।
हताहति र क्षतिको विवरण तत्काल उपलब्ध हुन सकेको छैन। तर त्यहां गोली र बिस्फोटनका चर्का आवाजहरू आइरहेको बताइएको छ।
हाम्रा सम्वाददाताका अनुसार केहि समय अघि देखि नै नेपालगञ्जमा विद्रोहीहरूको ठूलो आक्रमण हुन सक्ने विद्यमान आशंका र गत हप्ता नेपालगञ्जका सिमा चौकी लगायतका स्थानमा भएको आक्रमणपछि सुरक्षा व्यवस्था कडा पारीएको थियो।
मंगलवार बेलुकीको आठ बजेतिर आरम्भ भएको दोहोरो भिडन्तका माझ स्थानिय बासिन्दाहरू आ-आफ्ना घरहरूमा त्रसित भएर बसिरहेका बताइएको छ।
कारगार नजीक भिडन्त हुंदा छेवैको अस्पतालमा वातावरण आतंकित बन्न पुगेको थियो भने , नेपालको समय अनुसार रातको एघार बजे यो समाचार तयार पार्दासम्म चारजना घाइते प्रहरीलाई उपचारार्थ अस्पताल लगीएको थाहा भएको छ।