नयाँ पत्रिका
काठमाडौं, ४ साउन
युथफोर्सलाई एमालेले पार्टीमातहत सीधै चलाउने भएको छ । यसअघि युथफोर्स एमाले भ्रातृ संगठन प्ररायुसंघको मातहत थियो ।
पार्टीको स्वयंसेवी संगठन पिपुल्स
भोलेन्टियर्स, युथफोर्स र पार्टीको अतिरिक्त क्रियाकलाप विभागलाई समायोजन
गरी युथफोर्सको नयाँ संरचना बनाइनेछ ।
पार्टी केन्द्रीय समितिको दोस्रो बैठकले
फोर्सको समायोजित संरचनालाई सम्बन्धित तहका पार्टी कमिटीहरूबाट सीधै
सञ्चालन गर्ने निर्णय लिएपछि नयाँ संरचनासम्बन्धी निर्देशिका बनाउन
लागिएको हो ।
केन्द्रीय कमिटीको दोस्रो बैठकले तीनवटै
संगठनलाई समायोजन गरी नयाँ सांगठनिक संरचनासम्बन्धी निर्देशिका तयार गर्न
केन्द्रीय सदस्य योगेश भट्टराईलाई जिम्मेवारी दिएको छ । उनलाई एमालेले
युथफोर्सको संयोजकसमेत तोकेको थियो । पार्टीका अन्य भ्रातृ संगठनलाई
फाँटअन्तर्गत परिभाषित गरिए पनि युथफोर्सलाई पार्टीरक्षक दस्ताको रूपमा
परिचालन गर्न लागिएको छ ।
कार्यदलले निर्देशिका केन्द्रीय कमिटीलाई
बुझाएपछि समितिले अनुमोदन गरी युथफोर्स परिचालन गरिने फोर्सका संयोजक
भट्टराईले बताए । उनले निर्देशिका निर्माण अन्तिम चरणमा रहेको र यसै साता
पार्टीलाई बुझाइने जानकारी दिए ।
निर्देशिकामा पार्टीको केन्द्र, जिल्ला,
गाउँ, नगर र वडा तहबाट पार्टी संयन्त्रले नै प्रत्यक्ष फोर्स परिचालन
गरिने उल्लेख छ । 'पार्टीले स्वयंसेवी संगठनको रूपमा युथफोर्सलाई
प्रत्यक्ष सञ्चालन गर्नेछ,' संयोजक भट्टराईले नयाँ पत्रिकालाई बताए ।
पार्टीका कार्यकर्ता, विचार र संगठनको
रक्षा, जनसेवा, प्राकृतिक प्रकोप उद्धारजस्ता काम फोर्सले गर्ने भट्टराईले
वताए । 'पार्टीको प्रत्यक्ष निर्णयअनुरूप पार्टीपंक्ति, संगठन र
कार्यकर्ताको रक्षा, प्राकृतिक विपत्ति र प्रकोपवाट जनताको उद्धार गर्ने
काम यसले गर्छ,' भट्टराईले भने ।
पार्टीको अतिरिक्त क्रियाकलाप विभाग,
पिपुल्स भोलेन्टियर्स र युथफोर्सका एक-एक प्रतिनिधिसहितको टोलीले यसै साता
निर्देशिका टुंगोमा पुर्याएर पार्टीलाई बुझाउने युथफोर्स प्रमुख महेश
बस्नेतले वताए । नयाँ संरचनामा जाने भएपछि युथफोर्सले आफ्ना सांगठनिक काम
स्थगित गरेको छ । निर्देशिका निर्माण कार्यदलमा पिपुल्स भोलेन्टियर्सका
रूपनारायण श्रेष्ठ, युथफोर्सका ज्ञानकुमार श्रेष्ठ र अधिवक्ता वसन्त
बस्नेत छन् ।